आळंदी : ग्रामीण भागात राहणाऱ्या लोकांना अधिकाधिक गुणवत्तापूर्ण आरोग्यसेवा मिळावी, या उद्देशाने ब्रिजस्टोन इंडिया, या आघाडीच्या टायर उत्पादक कंपनीने आळंदीजवळ असलेल्या इंद्रायणी हॉस्पिटल अँड कॅन्सर इन्स्टिट्यूटमध्ये हिस्टोपॅथॉलॉजी प्रयोगशाळा उभारण्यास सहकार्य केले आहे. ब्रिजस्टोन इंडियाचे संचालक अजय सेवेकरी, इंद्रायणी हॉस्पिटलचे विश्वस्त व्यवस्थापक संजय देशमुख यांच्या उपस्थितीत नुकतेच या प्रयोगशाळेचे उद्घाटन करण्यात आले.
या उपक्रमाबाबत ब्रिजस्टोन इंडियाचे व्यवस्थापकीय संचालक पराग सातपुते म्हणाले, ‘लोकांसाठी चांगल्या आरोग्यसेवा उपलब्ध करून समाजाप्रती असलेली आपली वचनबद्धता जपण्याला ब्रिजस्टोनने नेहमीच प्राधान्य दिले आहे. दुर्गम ग्रामीण भागात राहणाऱ्यांना अधिकाधिक गुणवत्तापूर्ण आरोग्यसेवा मिळावी यासाठी आम्ही काही आरोग्य संघटनांसोबत काम करत आहोत. कर्करोगासारख्या गंभीर आजारावर उत्तम उपचार मिळणे आजही अनेकांकरिता कठीण आहे. त्यामुळे सर्व रुग्णांकरिता चांगले उपचार आणि सेवा पुरविण्याची कास धरलेल्या इंद्रायणी हॉस्पिटलला साह्य करताना आम्हाला आनंद होत आहे.’
या हिस्टोपॅथॉलॉजी प्रयोगशाळेत सर्व अत्याधुनिक सोयीसुविधा असून, यामुळे तातडीने निदान करणे आणि उपचार करणे शक्य होणार आहे; तसेच खर्चातदेखील बचत होणार आहे.